Ако внесуваш чиста храната, целата твоја природа ќе биде чиста
- вели Саи Баба -

Денеска многу често се зборува за здравата храна, но што всушност е тоа? Дали тоа значи само внесување на квалитетни прехрамбени продукти или е нешто многу повеќе?
Сатја Саи Баба вели дека храната игра клучна улога во определувањето на мислите, чувствата, зборовите и делата.
Тоа произлегува од квалитетите на храната, коишто можат да бидат сатвички, раџасички и тамасички.
Имено, сатвичка храна е онаа храна којашто пред се му е понудена на Бога, храна којашто е чиста, природна, жива. Храна која се јаде во умерени количини, којашто го нема префиксот пре – многу, топло, солено ...

Сатвичката диета не ја подразбира само храната, којашто ја земаме преку устата, туку и чистиот воздух што го дишеме преку носот, чистата визија што ја гледаме со очите, чистите звуци што ги слушаме со ушите и чистите предмети, што ги допираме со рацете и нозете.
Во сатвичка храна се вбројува и чистата вода, чистата околина, вежбањето, доволно одмор и спиење, доволно Сонце како и постење еднаш во неделата. Ваквиот начин на исхрана обезбедува долг и квалитетен живот, развива љубов, добрина, мудрост, односно ги развива сите добри квалитети во човекот.

Раџастичка храна е сета онаа храна која е одгледувана со вештачки ѓубрива и други хемикалии. Тоа е храна којашто е премногу солена, топла, горчлива... вклучува и употреба на алкохол и цигари. Подразбира читање на многу книги, списанија, весници, гледање на многу филмови, особено страствени сцени како и слушање на агресивни звуци. Ја поттикнува активноста, агресијата, лутината ...

Тамасичка храна, пак доведува до состојби на пасивност, депресија, мрзеливост, тапост... Тоа е исхрана со многу индустриска и вештачка храна, месо, чоколадa, кафе, масти, дрога и лекови. Поставување на безначајни прашања, гледање ужасни сцени и непријатни миризби.

Сатвичката храна е од најголемо значење за нашиот духовен живот и здравје. Јадењето сатвичка храна е и прочистување на умот и лечење на телото. Сатја Саи Баба вели: На здравиот ум му треба здраво тело. Здравјето е основен услов за успех на сите полиња во животот.
Лутината, зависта, стравот, грижите, лошите мисли, лошото друштво и лошата храна се плодна почва за болестите. Многу болести се производ на погрешни навики на исхрана.
Контролирајте ги телото и сетилатa, покорете го умот, јадете умерено и ќе живеете долго. Јадете само сатвичка храна; таа води кон самореализација“.